- 1уйре дика хила хьа! Ца1 зе ара-м ваьннав Дада-Теми, хетаргахьа. Д1авига аз хьо? – машен соцаяь, кхайкар сога юртахо, ткъаь итт шу хургдола з1амсаг. Со вашаш саг вар из, массаза а безаме юхь йолаш, дег т1а йис йила воацаш.
- Диканца дукха вахалва! Назране кхача лерх1ар аз, хьо цу оаг1ара ласташ вале.
- 1а яххача ластаргда-кха вай, - аьнна, машен лехкачо улувра ни1 йийллар Мовсара. – Со кхы доаккха г1улакх долаш араваьннавац. Ха шортта я вайга.

- Дала воахаволва хьо!
З1амсага ловца баьккха, чухайра со цхьа инмарка я яхача башха машена чу. Бакъдар аьлча, Мовсара-м кхо дацар моллаг1а дика а. Наьха мотт ховш, ший жерал яьг1ача наьна сий деш, из боча лелаеш, хозача оамалашца наха бага вахавар из. Т1аккха, т1ехьа дика дешаш институт яьккха, х1анз цхьа дахчан белхаш деш йола поале 1ойила къахьегаш вар истолаш г1андаш 1алашдеш.
- Юртар арадовлалца шортта даха дезаргда вай. Ц1аьрмата ва ма алалахьа, Дада-Теми, х1аьта кхо хетт сона ер машен. Цхьа ямочни ремонт яха белхаш доладаьр укхаза дорожникаш кхо шу хьалха. Хетаргахьа, бицбенна хилабезаш ба уж, кхычахьа де дезаш дукха долаш. Е шоаш баь болх кхоачам болаш хийтабий хац.
- Из фу яхалга да «ямочни ремонт»? – кхийтанзар со.
- Наькъаш т1а к1оагаш дийна моттигаш афсальт 1обехкаш нийсъеш къахьегам бара из ба-м, бакъда, хьагураш-м богамаш я…
Мовсара ше ала венар чакхе т1а дига в1аштехьадаьланзар – машен тохаелар хорш еча санна. - Ер я-кха из ямочни ремонт! – велавелар из.
- Х1анз кхийтар со. Модж д1аяша венача Цагена, парикмахер ва яха говзанчо ше ходаваьча метте боамбий т1алотабеш хиннаб. Цхьа оаг1о ший иштта цо к1ай йича, г1атав ер. «Фу ду 1а?» - хаьттад вокхо. «Цхьан басилга т1а 1а боамбий д1а ма бийнабий, вож тха д1аде юттаргъя вай», - аьннад Цагена. Хетаргахьа, «оаха богамаш хьа ма яьйий, оаш д1ахо шоай машенашца уж д1анийсъелаш», аьнна, д1абахаб болхлой. Вай мел дара-м да, к1аьнк, иштта. Тоалуш-м доаг1ар вай, х1аьта а цу коммунистий хана ц1ийх латтар д1адалац-кха. Уж «вай» е «юкъара» яхаш дола дешаш чувхадеш хьадоаг1а мехка оттам хувцабеннабале а.
Мовсар дика кхийтанзар аз аьнначох. Цун б1аргаш чу хаттар латтар.
- Россе доалаш цхьа тамашне х1ама да, к1аьнк. Никъ тоабе, аьнна, хьахийца ахчах хьакимо эггара хьалха шийна машен эц, т1аккха воча наькъа т1а цхьаннахьа ахка вахе из машен а йохаю ше а лозаву. Вайбараш т1ехьабиса ца г1ерташ хьувз. Кхетам эш къаман доалахьа дара – ший доалахьа долчунах д1а ца эде. Х1анз укх сахьате из боацаш ба.
- Нажим ма лоаттайора цу наха 1аьдало, даггара «оаш бу болх лертт1а хьабе», яхаш. Селхан вай телевидене хьежаш ваьг1ав со. «К1ур» бара паччахьа баьра. Чиновникаш ба яхачарга д1а ца оалаш х1ама дисанзар.
- Къар-м лургвац, к1аьнк, батт аьшкан яра, 1а тока аьрсергаш цун т1акхохье а. Цхьабола хьакимаш лаьрхх1а шоашта къоастаяьча меттиге хьалкхебича сенна ба – цига эхь, бехк, яхь оалаш дола башха дешаш в1алла чулоацам болаш хетац…
Са къамаьл хоададеш, тохаелар ц1аьхха машен.
- 1а фу дий, Мовсар, уккхаза 1овакхалахьа со.
- Х1ана? – цецваьлар вож.
- Сага дег1 лоаттадераш т1ехкаш я. Ши б1аь совг1а яле, царех ца1 кагъелча вахар къахьлу. Со сай т1ехкех ваш, боча я са уж, цудухьа к1езига когаш хьоастаргда аз баьй болча г1олла г1аш вола а венна. Назране ваха а чам д1абаьлар са. Сабардергда аз «ямочни ремонт» яха х1ама т1ехкашта зенехьа йолга ер никъ «тоабаьча» болхлош кхетадалца.
газета "Сердало"