Массайолча хана чухь, Кхоллархочо могъяьйоацача дунен морзонашца 1ехлуш хиннаб нах. Из бахьан долаш, адам талхаш, х1алак хулаш хиннад. Х1аьта таханарча заман чухь, вай къамах а кхийттад цхьа лазар, лазар хинна а ца эш, у да из-м. Шевар цхьа дег1 санна, вай цун духьал ца овтте, массадолча оаг1орахьа вайна зе хургда цох…. Тайп-тайпара ц1ераш яха йиш я цох, х1аьта ма1ан ца1 да¬ − кхааш ийдари уж д1ателари!

− Х1ай, хьехархо ц1и яр! 1илман ганз тхона тела декхарийла вар! Хьо ма вий къонача кагирхочоа, нийса никъ гойташ, цунах сийдола, къаман накъаваргвола саг ве везаш вар! Кхетам боацашше 1а даьча б1ехача г1улакхах диплом хьаийцача хьа дешархой кулгах, нах лозбича, боабича жоп дала кийча вий хьо?

−Х1ай саг! Бокъо лорае эттар, хьо ма варий наьха дегашка кхерам хургбоацаш, цар вахара тешаман боарам хинна д1аоттавезар!

− Аттача рузкъанца 1ехавенна, малара кеп йола водитель кхаах 1айха д1авохийташ, жоп лургдий 1а цо боабаьча наха хьалха? Корт бохабеш долча х1амаш х1алакдаь, эзараш эзараш синош дагаухарий хьона, дохкархочо хьа кисаш дузача хан? Тахан хьо хьарам рузкъа гулдеш, г1адводаш вале а, ва саг, хьо виц ма лелахь! Из хьайца каш хьоргдац 1а…. Т1адоаг1ача Къемата дийнахьа жоп ца луш а вусаргвац хьо!

Источник: www.radio-angusht.ru