Тахан вай мехка наькъашка латта хьал ч1оаг1а г1айг1а яйташ да. Цхьа ди д1адодий- хьог1, аьнна хет наькъ т1а авари я саг ца леш е лозацавеш. Х1анад -хьог1 из иштта? Мича даха сиха да вай? Хулача хатарий цхьа массал доаладергда аз. Мух мо масса х1ана йодац аьнна хеташ, цхьан машенал хьалха йоал вож. « Из сол хьалха мишта воал?»- аьнна цунна т1ехьа хоахк т1ехьавитачо ший машен. Хьалха вала эттача духьала т1авоаг1ар нийсвелле цигача хьахул доккха хатар. « Малаг1а бахьан долаш сол хьалхаваьлар-хьог1 из?» аьнна ийла йой-хьог1 цхьанне а. Массаг1а х1ама хул вай вахаре:

чехка лора т1акхача везаш лозаваь саг больнице вига везаш е цхьаннахьа т1ехьавусаш сиха ваха везаш, массаг1а да уж. Машен хьалхайоаларгах хахка моттиг йолаш ма йий вай мехка! «Водар вахийта!»- яхад вай даьша. Бакъахьа дар-кх из кица дагадохаре цу моча моттиге. Масса да-нана во 1 воацаш, йийша-воша воша воацаш, сесаг мар воацаш, берех бой деш, е безараш- бовзараш боацаш биссаб цу наькъашка хулача хатарех. Цхьа массал мара дац из. Ужаш дувца отте чаккхе йоацаш дувца йиш я. Наькъ т1а боаллача к1оага юстара воаллашехь, сов масса машен хахкарах, к1алт1айийна е духьала т1авоаг1ачунна новкъа ваьле цигача ши машен в1ашка кхеташ нийлу. Х1аьта ловзараш деш, шоаш леладаьчох т1ехьаг1а доккхал деш из дувцар духьа, нах байна моттигаш я. «Дала иштта дег1а хиннад из»-оал вай. Дала-м яхац вайга сагаца хьаг1 лелае е сихле. Сихвеннача сага цхьакхха х1ама дагадохац, е ший никъ а б1аргагац. Дукхаг1а цу наькъашка бовш латтараш кхийна д1аэтта кагий нах ба вай. Ишта а з1амига дар вай къам.
Боаг1ача боарамал сихаг1а машен хаьхка кхелхача сагах бусалбо дыно фу йоах дийцар Алхастера маьждига имам волча Дзейтов Османа Исма1ала: «Бусалба дыно могадац машен 1аьдало оттабаьча боарамал сихаг1а хехка. Наькъашка хьалдийтта ма доахкий уж х1аракаш, малаг1ча скорастех мичахьа г1олла ваха мегаргва. Нагахьа санна цу боарамал т1ех а ваьнна, сиха машен хаьхка саг д1акхелхача, из саг ший дег1 дийнарг лоарх1. Из доккха къа да. Ший дег1а хьурмат лораде дез х1аране. Даьла къахетаме ва вайца, Цо шийна 1ибадат де хьакхеллад вай. Еррига маьженаш могаш йолаш Дала хьакхоллар а лелар, цхьаккха саг мах баь варгвоацаш, доккха беркат да. З1амига волча хана денз могаш воацача сага-м дика ховргда из. Могаш волчо леладер мара дац х1анз вай дувцар. Корта бохабеш дола малар менна а, е наркотик- маха теха ший дег1а доал де ца могаш д1акхалхарах вай Дала лорадолда! Цул доккхаг1а во сагага доаг1аргдац. Цхьанне а бокъо яц ший дег1а зе а деш шийна т1акхувда.
Укхаза ала доаг1а цхьаькха. Цхьаннена хац ше малаг1ча метте, маца лергва. Дала шийна ег1ача ханал цхьаккха саг т1ехьа а е хьалха а варгвац. Мичара вера ца ховш машена духьала нийсвеле саг леш а ма нийслой наькъ т1а. Бахьан да из Дала оттадеш. Цхьа дувцар дувцаргда аз укхаза. Сулейма пайхамара (с. а. с.) заман чухьа хиннад из. Цхьа къонах венав пайхамар (с. а. с.) волча. Цо аьннад цунга: «Х1индий мехка ваха хьашт долаш вар со укх сахьат чухь. Михаца д1авахийта со цига, сихаг1а кхоачаргволаш». Царна гаьна доацаш Мулкалмовт хиннад латташ, цу къонахчун къамаьл хезача деладеннад из. Ше къонах д1авахийтача хаьттад пайхамара (с. а. с.) малайкага, сенах деладелар хьо, аьнна. «Цу къонахчун укх сахьт чухь Х1индий мехка са эца аьнна Дала амар даьдар сога. Из селлара ч1оаг1а в1ашдухьала нийсдаларах цун къамаьл хеза деладелар со»-аьннад малайко. Цхьаккха саг варгвац 1оажалах-м, амма бакъда, «Б1оаг1а т1ехьашка ваьле а лорале»- йоах вайга Дала. Дала сабар а иман а совдоаккхалда вайна юкъера».
«Сабар-ялсмален д1оаг1а да»,- оалаш хезад сона дукхаза а. Ший бокъонаш а йовзаш, сабаре хилва х1ара наькъахо. Шийга ц1аг1а хьежараш дагабохалба сихвеннача хана.
Цхьаькха а да машена наькъ т1а лораде дезаш х1аман-лерх1ам. Вай къаман эздела дакъа да из, т1ехьарча хана вайна юкъе лаьг1луш латте а. Наха юкъе лерх1ам хиларо хьахьокх барт болаш уж нах хилар. Воккхаг1чунга воккхаг1ал хилча, з1амаг1чунна ше з1амаг1а волга ховш хилча цхьан ц1аг1ар дезал мо дахаргдар вай. Х1аранена ший моттиг малаг1а я ховргдар.
P.S. Цхьа саг шийл т1ехьа хилча ла магац вай кагирхошта. Машен шийчул массаг1а хилча е таро т1ех хилча. Хила йиш яц иштта, массаварг цхьаттара мича кхеллав вайх Дала . Х1аранена цхьацца вахара говзал еннай вайна, х1аранена ший никъ беннаб. Из малаг1а ба дего хьех вайна. Ший маьрша, хьаьнала, ялсмале вугаргвола никъ хьалаха а укх дунен чура вахар д1ахадалца, цу т1ара ца вала а аьттув хилба х1аране.
ОЗДОЙ Малика
"Сердало"