Мехкахой! Самардийнахьа Назране Железнодорожная оалача наькъ т1а машенаш в1ашка а кхийтта, доккха зулам хиннад. Дукхача наха вас, бала хиннаб цу г1улакхах. Дагадоаца нах боабаьб цига хиннача зуламах. Хийлане коа г1айг1а, сагото ессай. Веннараш пхи саг ва. Х1аьта халача лазарах болаш больнице а бада цу зуламах лозабаь нах. Цул совг1а из зулам доацаш кхы а машенаш в1ашкаетталуш зуламаш хиннад укх к1ира, вай мехка нах боа а беш. Д1альарх1ача укх т1ехьарча деношка байнараш иттнега кхаччалца саг ва. Уж малаг1аш ба? Кагий нах, к1антий, мехкарий, х1аьтта вахар даа хайшараш, дуненца д1а а ийна къаман, мехка пайда бе ха, арг1а яраш. Воа, ва нах! Хала хетаций вайна уж зуламаш хьахезача? Уйла еций вай мел эшам ба из, цу мо цкъа хиннача зуламах пхиъ, кхоъ, виъ яхар мо саг валар!?

Тахан деба, даржа, сомадовла дезача хана, машенаш в1ашка а етташ воаша доадеш латта вай. Деррига а фу бахьан долаш да, воай мелал мара кхы х1ама дац. Сагот дац вай ког то1абичахь, д1ахо фуннаш1а хиннадар аьнна.
Х1ара к1ира радио "Ангушт" г1олла а, вешта телевидене а, газеташта а, шоаш болча балха а ГАИ болхлоша хьакхайкаду вайга, машен масса ма лелае, т1ехкар д1атоха, боарамал т1ех ма дувла, ха йоацача берашка машенаш д1а ма тела, шийга машен лалла бокъо йоацачо, бокъонаш ца йовзачо машен ма лелае, яхаш. Х1аьта вай къор долаш мо мара ладувг1атигац цар дувцачунга а, наха дувцачунга. Иштта хур хургда, хиннар гургда, аьлча мо долхаш да-кх вай, д1а-хьа а ца дерзаш.
Нагахьа санна воашта ловра, воашта хетар мара вай дергдеце-м, царга д1ааьлча бакъахьа да вай. "Тхо шуга ладувг1а лаьрх1а а дац, оаха тхоай хьашт дар мара хьа а дергдац, чуг1о шоай ц1аг1а дита тхо харца лела а, зуламаш де а аьнна". Дадала вай, ма тоа а деннад-кх г1улакх. Даггара д1ат1а а етташ машенаш, нах боабеш латта, х1аьта вай уйлае тигац, цу 1оажала к1ал вайх а саг ваха йиш хилар, вай коа а из 1аьржа ди да йиш йолаш хилар. Маца хьаькъале хила лаьрх1а да вай!? Маца кхета лаьрх1а да вай!? Маца совца лаьрх1а да вай!? Из сий дола Аллах1 Даьла эг1аз ма г1олва вайна.
Валлах1ий ч1оаг1а тамаш ма ю аз, вай ишта лелара. Воа ц1аг1арчар а, е коара-картарчар а мича оал лорале, Из еций йоккха тамаш?
Машенаш в1ашка а кхийтта нах байна, д1атехкача хула бахьан малаг1а да, тхьовра аз дийца т1ехкар, хьа ца тохарахи, лоаллаш баг1арашта машен лелае ховш ца хилари, корта бохабу х1ама менна, е теха биха хилари. Уж да-кх, керттера бахьанаш.
Дукха къахьег дас-нанас ший дезалхо кхевеш, нийсса а ваь къонах а ваь из хьалъоттавеш, х1аьта вай ехье машен т1а а техе цар мел хьийга къа доаду. Мегарг ма дац уж зуламаш леладе.
Бокъала а, дехар да са шуга мехкахой! Уйлае укх г1улакха, доадергдацар вай воаша. Шорттига д1алалла из машен. Геттара висача а итт минот мара т1ехьа вусаргвац вайх саг.
Дала сома доахалда вай. дала тоадолда вай хьаькъалаш, Дала иман, тем лулда вайна.

Матенаькъан Илез!