Цхьан дийнахь, ший Нана ишколер чуярга ч1оаг1а сатесса хьежашвар Берснакъ. Ишколер ераш чуболхаш, цхьан доттаг1чо дийцачунца дувзаденна дар цун из. Цо йоахар: «Х1ара сагаца ший малейк да, цу малейка саг лорву, г1о а ду, цкъаза фу дича бакъахьа да а хьех». – Цунга ладийг1ачул т1ехьаг1а, ший з1амигача хьаькъалеча керта чу дукха хаттараш 1айна Берснакаъ чувахар.

Ше балхара чуйоаг1ашше, ц1аг1а г1олла лостам бе йолаеннача ший Нанна т1авахар из.

– Нани, – хьоаставелар Берснакъ. – Новкъостал де сона. Цхьа х1ама кхетаде магац сона, цкъаза сайна ловш дола х1ама хьадац аз, е из де низ а кхачац. Х1анад са из ишта? Масала, сона хов 1а дукха болх белга, хьо к1аьд лулга а хов сона. Дагадоал сона из, цу хана уйлаш хул са, хьона новкъостал де, ду а ду аз… Х1аьта цкъаза, сай г1о де дезашше, ара берашца ловза вода со. Х1ана ду аз из иштта? Хьо дукха а ма езий сона.

– Хьо сона а веза дукха, са во1алг, цу тайпара х1амаш-м массаболча наха а хул.

– Бакъда из? Ма дика болх ба-кх, сона-м се ца1 мара вац моттар иштта, Нани, т1акха сен хул из иштта? Ший уйлашта тара х1ана хилац сага г1улакхаш?

– Из х1анад аьлча, во1, х1ара сага юхе хул ши кхоллам. Ца1 малайк да, вож шайт1а да. Даьла эг1азло хийла цун.

– Нани, малайка фу ду вайна?

– Малайка, Даьла амарца, дика мел дар дагтувса сага. «Нийса хила, хьайга яхар де, нахаца дика хила» оал цо вайга. Деррига малейкаш Даьла ц1ена лаьш да, уж массехана Далла 1ибадат дещ, цун амараш кхоачашдеш, б1арга ц1азам тохача юкъа 1аьса доацаш Далла мут1ахьа да. Уж раьза хилац, наха во г1улакхаш леладеш хилча, хала хет царна, цу тайпара х1ама нийсделча.

– Ма тамашийна х1амаш да уж, са Нани. Амма мишта хул уж Малайкаш? Х1аьта вай Нане сога цкъаза ма оалий: «Са з1амига малайк» аьлий, т1аккха сона тара да, соца дола са малайк?

– Аааа, са во1алг, малайкаш наха в1алла тара а дац. Нане хьох з1амига малайк оалар фуд аьлча, бераш къинош ца деш, малайкаш санна ц1ена да яхилга да из. Малайкаш вайна б1аргагац, цар х1ама яац, цхьаккха малар эшац царна, в1алла наб а еш дац уж.

Нанис дукхаг1а мел дувца, хаттараш сов дувлар Берснакъа. Геттара чам чубена ладувг1ар цо цунга.

– Нани, т1аккха шайт1о фу ду сага?

– Берснакъ, со раьза я хьона ч1оаг1а, иштта 1а сайга дукха хетташ а, хьона ер ха чам болаш а. Ер х1амаш х1ара бусулба сага ханза даргдоацаш да. Шайт1о фу ду аьлча, цо во мел йола уйлаш дагтувс сага. Из г1аддода, вай в1аши эг1аз ухаш, барт бетташ хилча. Боккхачарга ладувг1аш воацаш, цар яхар ца деш хилча, з1амагчарех къа ца хеташ, царца къиза хилча, раьза хул шайт1а.

– Иии, ва Нани, сона т1аккха цар оазаш хьа мича хоза в1алла « ер де» е « ер ма де» яхаш?!

– Нийса ях 1а, са к1аьнк, цар шоай дешаш вайна уйлашца дагтувс. Цудухь вайна хьахазац уж. Хьона ха деза, 1айха дикадар деча хана, малайкаш г1адъухаш долга, х1аьта во г1улакхаш хьо кхоачашде воале, шайт1аг ладувг1аш, из раьза деш воал хьо.

Геттара уйлане ваха вар Берснакъ, цецваьнна вар из, шийна в1алла б1арг ца гуча х1амаша, сел ч1оаг1а сага вахаре хувцамаш деш хиларах.

– Х1ааа нани, со кхийтар х1анз, шайт1о вай безам боацашше, хьадайта вайга цхьадола г1улакхаш.

– Бакъ лув хьо са к1аьнка, амма бакъда, шайт1ий низ ийша ба, из мишта эшаде йиш я а, малайкии шайт1ии оазаш къоаста мишта е еза а аз х1анз хьехаргда хьона.

– Нагахьа санна, са во1алг, хьона дагадеха х1ама 1а хьадеча, хьона Даьла раьза хургвале, халахь, из малайки оаз йолга. Х1аьта во х1ама хьона дагдохе, шайт1а хьона низ бе г1ерт хьона. В1алла из теркал де йиш яц хьа! Шайт1а духьал латта сага аттаг1а хургдолаш, лаьрхх1а дешаш да вайна. 1уйран сома ваьлча, е хье 1овужача хана 1а уж дешаш оале, Дала дийнахьеи бийсани воча х1амах лоравергва хьо. «А1узубиллах1и минашшайт1оанир роаджим» яха дез 1а. Цу дешай МаIан: «Со Даьлаца Дала Ший къахетаманна гаьна даьккхача шайтIах лоралу» яхилга да из.

– Нани, х1аьта б1арга х1ана гац вайна шайт1а а малайка а?

– Цар кхоллар, куц, сага чун тара дац, са во1. Малейкаш сердалах, нурах кхелла да, шайт1а ц1ерах кхелла да. Саг сенах кхелла ва аз ма дийцадий хьона.

– Х1аа, дагадоаг1а сона, топпарах ваьлга дийцадар 1а сона саг.

Берснакъ з1амига волча хана денз, сакхетам болаш, шедола х1ама теркал деш к1аьнк вар. Шийна б1аргадайначох уйла еш, цунах хаттараш телаш, ший 1аьдала зем боаккхаш вар из ондарг.

– Нийса ях, 1а са во1, тахан аз дийцачох а хьо дика кхетаргва аьнна хет сона.

– Нани, мел миссел малайкаш да дуне т1а?

– Ооо, са к1аьнк, малайкаш ч1оаг1а дукха да. Дунен т1а а сигаленашкахьа а да уж. Цар таьрахь Лакха волча Аллах1а мара хац. Цул совг1а, х1ара малайк ший декхараш долаш да. Иштта моллаг1ча сагаца ший малайк да.

– Со х1анз тувлавеннав, 1а дувцачох, х1анз сона юхеи хьона юххеи шишша малейк да? Вай б1аргагу царна х1анз?

– Х1аа, х1анз вай дувцачунга ла а дувг1аш, малейкаш да-кх укх ц1аг1а. ца1 Ракиб яхаш, дика г1улакхаш а дика уйлаш а яздеш да, х1аьта шоллаг1дар Атид да, сага во г1улакхаш язду цо. Малейкех лаьца дувца-м дукха да са во1, аз т1ехьаг1а кхи а дувцаргда хьона. Къаьстта керттерча малайках лаьца. Х1анз волле кулгаш диле, шунгахьа г1о, х1ама дуаргда вай.

– Мегаьд, со-м дукха ха я мец вола, х1аьта а, 1а дийцачох айса кхетадаьр дувца мегий аз?

– Дувц, са во1.

– Сона х1анз хов, х1ара сагаца, дика г1улакхашии во дараши д1аяздеш ши малайк долга. Лаьтта г1олла а сигала т1а геттара дукха да уж, цар х1аране ший болх а ба. Сона кхи а хов, малейки шайт1еи сага тарадоацалга, уж вайна б1аргагац, малайк нурах кхелла да, шайт1а ц1ерах кхеллад, х1аьта сага-м топпарах ваь ва. Т1аккха цар х1арачун оазаш а йовзагья сона х1анз, уж къоастае хов сона. Кхи а эггара ч1оаг1аг1а да, сона шайт1ал кот мишта вала веза хов!

– Мишта? Дувцал во1.

– 1уйран сомаваьлча е, бийсанна д1атхьовсача хана «а1узу биллах1и минаш шайт1оанир-роаджим» ала деза. Т1акха аз из аьлча, сона шайт1а юхе доаг1аргдац, 1а сайга де мел аьннар хьаде а хьожаргва со.

– МашаАллах1, беркат далда хьох са во1! Дика кхетадаьд 1а шедар, со ч1оаг1а раьза я хьона, х1анз хьаволе, х1ама дуаргда вай.

Нанис шийна дийцачох уйла еш вар Берснакъ х1ама дуаш ше ваг1аш а.

Источник: www.radio-angusht.ru