Дерригача хьалкъашта юкъерча наьна метта денна хетадаь Г1алг1ай Республика Мехк Да кхайкарал.

Хьамсара мехкахой!

Тахан вай мехка, дерригача дунено санна, белгалдеш да наьна метта ди.

Мотт - адама уйлан лоарх1амег1а бола г1ирс ба. Меттаца гучадоал дика мел дар: хьаькъал, сакхетам, эхь-эздел, г1улакх, сий, денал.

«Дикача хьехамал - дикаг1а саг1а дац», - йоах кицо. Хьехам, хьаькъал луш г1алг1ай мотт болга тешал деш да уж дешаш.

Г1алг1ай меттаца дувзаденна да сага вахар: кхетам, культура, вай къаман 1аьдал. Вай х1аране декхар наьна мотт шаьрбе, 1омабе, боча а болаш лелабе. Меттаца бала боаца саг, ший къамаца бала боаца саг ларх1а мегаргва.

Ший ерригача истореца багахбувцамо кхебеш хьабеннаб гIалгIай мотт. Мах баь варгвоацаш хоза а, бIаьхий а ба вай мотт. Из вай лора ца бой, из вай ца кхоабе, хургдац къам а. Вай декхар да эзар шерашка даьша кхаьба, тахан воашта хьабенна, воай наьна мотт лорабе, цунна лерх1ам бе.

Вай лоарх1ам ба беза кхувш йог1ача т1ехьена. Ха деза лебеча меттага хьежжа хул наха юкъера сага лоарх1ам а. Мотт бийцача доаллаш дац, из нийсса бувцаш ца хуле. Наьна мотт боврагабоацаш болх бе беза хьара дезале а, школашка, 1илма-тохкама институташка. Къаьстта лоарх1аме дакъ лаца деза цу балха юкъе хьехархоша, 1илманхоша, телевидени, радио, зорбан журналисташ.

Тахан вай воай паччахьалкхе хьакхеллай. Цун хам беш хила деза вай. Г1алг1ай Республика 1аьдало а, лоарх1аме лоаттадергда из г1улакх.

Аз даькъала дувц шо дерригача хьалкъашта юкъерча дезача наьна метта денца. Из вайна боаккха лоарх1ам болаш ди да.

Дала низ лолба вайна наьна мотта лорабе а, к1оаргга 1омабе а, цун къайленаш йовза а.

Дала барт ца1 болба вай!

Г1алг1ай Республика Мехка Да Евкуров Юнус-Бек